ПРЭР-2: Дүйнөлүк банк Баткен облусуна иш сапары менен барды
2025-жылдын 10–11-декабрында Кыргыз Республикасындагы World Bank өкүлчүлүгүнүн башчысы Хью Ридделл Баткен облусуна иш сапары менен барып, Экинчи «Баткен облусунда региондук экономикалык өнүктүрүү» долбоорунун (ПРЭР-2) алкагында жүргүзүлүп жаткан иштер менен таанышты. Сапардын негизги максаты — долбоордун ишке ашырылышынын жүрүшү менен таанышуу, жетишилген натыйжаларды мониторинг кылуу жана жеринде жолугушууларды өткөрүү болду.
Иш сапардын жүрүшүндө Хью Ридделлди АРИСтин аткаруучу директору Марс Наспеков, ПРЭР-2 долбоорунун координатору Гульмира Джумабекова жана долбоордун адистер тобу коштоп жүрүштү.
Сапардын алкагында делегация ПРЭР-2 долбоорунун негизинде ишке ашырылган социалдык жана экономикалык инфраструктура объекттеринин бир катарына барды. Баткен шаарында шаардык чөйрөнү жакшыртуу жана тургундар үчүн ыңгайлуу коомдук жайларды түзүү максатында курулган «Жаштык» жана «Жеңиш» сейил бактары каралып чыкты.
Мындан тышкары, делегация долбоордун төртүнчү компоненти — өзгөчө кырдаалдарга жооп кайтаруу (CERC) алкагында курулган жана калыбына келтирилген мектептер менен бала бакчаларга да барды. Сапардын жүрүшүндө билим алуу шарттарына, объекттердин коопсуздугуна жана чек арага жакын аймактарда балдардын билим алуусуна үзгүлтүксүз жеткиликтүүлүктү камсыздоодогу алардын маанисине өзгөчө көңүл бурулду.
Ошондой эле иш сапардын алкагында долбоордун колдоосу менен ишке ашырылган айыл чарба объекттери да каралды. Бул объекттер жергиликтүү өндүрүштү өнүктүрүүгө, фермерлерди колдоого жана калк үчүн туруктуу киреше булактарын түзүүгө багытталган.
Сапардын жүрүшүндө жергиликтүү өз алдынча башкаруу органдарынын өкүлдөрү, подряддык уюмдар жана долбоордун бенефициарлары менен жолугушуулар өткөрүлдү. Делегация долбоордук иш-чаралардын аткарылышын мониторинг кылып, иштердин сапаты жана мөөнөттөрү боюнча маселелерди талкуулады, ошондой эле ПРЭР-2 долбоорунун жыйынтыктары жана анын коомчулуктардын күнүмдүк жашоосуна тийгизген таасири тууралуу тургундардын түз пикирлерин укту.
